Балабақшаның атауы:

ЖК «Ақниет»

 «АҚ НИЕТ» ЖЕКЕ БАЛАБАҚШАСЫ

«Ақ ниет» жеке балабақшасы – әр баланың табиғи қабілетін ашуға, еркін ойлауына, шығармашылығын дамытуға және өмірлік маңызды дағдыларды қалыптастыруға бағытталған заманауи мектепке дейінгі тәрбие мен оқыту ортасы.

Балабақшаның сыйымдылығы: 54 балаға арналған.

Балабақшаға балалар 3 жастан бастап қабылданады.

Балабақшаның меңгерушісі: Джубаниязова Нурслу Дуйсенбаевна

 «Үшінші санатты басшы»

Байланыс телефондары:

8 747 985 74 66

8 705 319 24 70

БІЗДІҢ БАСТЫ МАҚСАТЫМЫЗ – БАЛАНЫҢ 5 НЕГІЗГІ ДАҒДЫСЫН ДАМЫТУ.

Бала үшін балабақша – тек білім алатын орын емес. Бұл – өзін танып, қоршаған ортаны зерттеп, достарымен қарым-қатынас жасап, ойын еркін жеткізіп, өз бетінше әрекет етуге үйренетін алғашқы әлеуметтік орта.

Сондықтан «Ақ ниет» балабақшасында әрбір оқу-тәрбие жұмысы баланың 5 негізгі дағдысын кешенді дамытуға бағытталады.

1. ДЕНЕ ДАМУЫ ЖӘНЕ ӨЗІН-ӨЗІ КҮТУ ДАҒДЫСЫ.

«Мен өзім жасай аламын!»

Баланың дені сау, белсенді әрі өзіне сенімді болып өсуіне жағдай жасалады.

Қимылды ойындар, сергіту жаттығулары, спорттық жарыстар, таза ауадағы белсенді ойындар арқылы балалардың:

-қимыл-қозғалыс белсенділігі;

-ептілігі;

-шапшаңдығы;

-тепе-теңдігі;

-үйлесімді қозғалысы дамытылады.

Сонымен қатар балалар біртіндеп өз киімін реттеуге, жеке бас тазалығын сақтауға, тамақтану мәдениетіне, өз заттарына ұқыпты қарауға және қарапайым тұрмыстық әрекеттерді өздігінен орындауға үйренеді.

2. ТАНЫМДЫҚ ДАҒДЫ

«Мен зерттеймін. Мен жаңалық ашамын.»

Балалардың білуге деген қызығушылығын арттыру үшін тәжірибе жасау, бақылау, салыстыру, сұрақ қою, зерттеу және қарапайым логикалық тапсырмалар ұйымдастырылады.

Балалар:

-қоршаған ортаны зерттейді;

-себеп-салдарлық байланысты түсінуге үйренеді;

-қарапайым математикалық ұғымдарды меңгереді;

-логикалық ойлауын дамытады;

-«Неге?», «Қалай?», «Егер…? » деген сұрақтар арқылы ойлануға үйренеді.

Біздің ұстаным:

Дайын жауап беруден бұрын – баланы ойлануға үйрету.

3. КОММУНИКАТИВТІК ДАҒДЫ

«Мен сөйлесемін. Мен тыңдаймын. Мен түсінемін.»

Баланың сөздік қорын байытуға, өз ойын анық жеткізуге және тыңдай білуіне ерекше көңіл бөлінеді.

Күнделікті ұйымдастырылған іс-әрекеттерде:

-әңгімелесу;

-ертегі құрастыру;

- рөлдік ойындар;

-сөздік ойындар;

-сұрақ-жауап;

- шығармашылық тапсырмалар қолданылады.

Балалар өз ойын еркін айтуға, құрдасын тыңдауға, сұрақ қоюға және диалог құруға дағдыланады.

Біздің мақсат:

Әр бала – ойын ашық айта алатын тұлға.

4. ШЫҒАРМАШЫЛЫҚ ДАҒДЫ

«Мен ойлап табамын. Мен жасай аламын.»

Шығармашылық – баланың қиялын ғана емес, оның ойлау қабілетін, дербестігін және өзін-өзі көрсету мүмкіндігін дамытатын маңызды құрал.

Балалар:

-сурет салады;

-мүсіндейді;

-жапсырады;

-құрастырады;

- музыкамен және қимылмен жұмыс жасайды;

-театрландырылған қойылымдарға қатысады;

- өз идеяларын шығармашылық жұмыстар арқылы жеткізеді.

Біз үшін баланың жұмысының «дұрыс» немесе «бұрыс» болғанынан гөрі, оның өз идеясын ұсына алуы маңызды.

Біздің ұстаным:

Әр баланың ішінде – ашылмаған бір әлем бар.

5. ӘЛЕУМЕТТІК ДАҒДЫ

«Мен біргемін. Мен дос бола аламын.»

Баланың ұжымда өзін еркін сезінуі, басқа адамдармен дұрыс қарым-қатынас орнатуы – маңызды өмірлік дағдылардың бірі.

Балалар:

- бірге ойнауға;

- кезек күтуге;

- бір-біріне көмектесуге;

- өзгенің пікірін құрметтеуге;

- эмоциясын дұрыс білдіруге;

- жанжалдарды бейбіт жолмен шешуге үйренеді.

Бірлескен ойындар мен топтық жұмыстар арқылы балаларда достық, өзара көмек, жауапкершілік және сыйластық қалыптасады.

Біздің қағидамыз:

Бала жалғыз емес – ол үлкен ортада өмір сүруге дайындалады.

«АҚ НИЕТТЕ» – ӘР БАЛА ҚАДІРЛІ

Біздің балабақшада балаға тек білім беріп қана қоймай, оның ойлауына, сөйлеуіне, сезінуіне, шығармашылықпен айналысуына, достасуына және өз бетінше әрекет етуіне мүмкіндік беріледі.

Өйткені бүгінгі баланың кішкентай қадамы – ертеңгі үлкен жетістіктің бастауы.

«Ақ ниет» – балалық шақтың әр сәті маңызды болатын орта.